(خلوصى بگڭ مكتوبيدر)
﴿وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ مِنَ الْاَزَلِ اِلَى الْاَبَدِ بِلَا اِنْقِطَاعٍ﴾
أيّها الاستاد السعيد!
رسالۀِ نور شاكردلرينڭ شخصيتِ معنويهلرنده أڭ عاجز، أڭ ضعيف و أڭ منفعتسز بر عضو اولمقله برابر، بو إنتسابڭ ويرديگى قوّتله، معنوى أفرادينڭ دعالرينڭ و قدسى حمايهلرينڭ همّتنه و ربِّ رحيمڭ كرم و عنايتنه طايانهرق، نائل اولديغمز صوڭ نورلى آثارڭ مطالعه و زواللى محيطمزدهكى نشرندن متولّد خالص سروريمزه و نهايتسز معنوى طويغولريمزه ترجمان و لسانِ عجز ايله حسّياتى إظهاره واسطه، باشده محترم و چوق مشفق و عزيز استاده و اونڭ توفيقِ خدا ايله أڭ قيمتلى معينلرى و رسالۀِ نور شاكردلرينڭ معنوى جسملرنده دائما فعّال و نوّار ناقل و ناشرلرى اولان قارداشلريمزه شكران و دعا بورجمزى إبلاغ ايتمك أمل و نيّتى ايله، شو عريضهجغى يازمغه باشلايورم.
أوّلا علوى و غيبى كرامتدن بحث ايدهجگم: مجموعة الأحزابده أرجوزه نامندهكى قصيدۀِ مباركى، فتحى بگده بولدم. بر چوق يرلرينى اوقودم. فضله تدقيق ايدهمهدم. آنجق سكينه نامى ويريلن و إسمِ أعظمى تضمّن ايدن آلتى إسم (فَرْدٌ ، حَىٌّ ، قَيُّومٌ ، حَكَمٌ ، عَدْلٌ ، قُدُّوسٌ جَلَّ جَلَالُهُ) اولارق بولدم. بو أسماءِ مباركهنڭ ورد ايديلمسنه مساعده و نه صورتله دوام إقتضا ايتديگنه أمريڭزى إسترحام ايدرم.
مرحوم جدّيمڭ حضرتِ على رضى اللّٰه عنه أفنديمز حضرتلرينه معطوف و أوّلجه عرض ايتديگم: (كَرَامَاتُ الْاَوْلِيَاءِ حَقٌّ) دستورينى تصديق صددندهكى