(خلوصى بگڭ فقرهسيدر)
بوگون حيرتى موجب، نظره جاذب، دقّتى جالب، معناسى لطيف، ترتيبى ظريف، توافقى نظيف، أنوارى ظاهر، إعجازى باهر، زبدۀِ برهان، أركانِ ايمان، بر لمعۀِ إعجازِ قرآن اولان و مبارك خسروڭ چوق مكمّل بر طرزده إستنساخ ايتديگى يگرمى طوقوزنجى سوز ايله، ملفوفى جدًّا چوق مهمّ مسئلهلرى جامع و بديع جوابلرى حاوى اون آلتنجى لمعهيى و بنم گبى تنبللره مكمّل بر درسِ ايقاظ اولان مكتوبى آلمقله بختيار و چوقدندر محروم قالديغم نورلره قاووشمقدن متولّد نعمته مظهريتدن طولايى، جنابِ خلاّقِ رحيمه تشكّردن عاجزم.
اوراده قارداشلريمزدن بش نوع عبادت حقّندهكى ايضاحلرى ايله كوتو شخصيتمه دگل، صِرف قرآنه، ايمانه، نوره، حقائقه متوجّه حالمه باقدم و قناعتلريمى يوقلادم. بن ده عين شيلرى دوشونمش و قناعت گتيرمشدم.
١ - أهلِ ضلالته قارشى مجاهده (اِنْ تَنْصُرُوا اللّٰهَ يَنْصُرْكُمْ وَيُثَبِّتْ اَقْدَامَكُمْ)
٢ - نشرِ حقيقتده استاده يارديم (وَتَعَاوَنُوا عَلَى الْبِرِّ وَالتَّقْوٰى ۞ وَاَطٖيعُوا اللّٰهَ وَاَطٖيعُوا الرَّسُولَ)
٣ - مسلمانلره ايمان جهتندن خدمت: (اِنَّ الدّٖينَ عِنْدَ اللّٰهِ الْاِسْلَامُ ۞ وَاعْتَصِمُوا بِحَبْلِ اللّٰهِ جَمٖيعًا وَلَا تَفَرَّقُوا ۞ اِنَّمَا الْمُؤْمِنُونَ اِخْوَةٌ) گبى آيتلرله (اَلدّٖينُ النَّصٖيحَةُ اَلدّٖينُ النَّصٖيحَةُ اَلدّٖينُ النَّصٖيحَةُ) حديثِ شريفى.