قرآنده موجود توافقاتى ايله برابر يازان حافظ على، خواجه صبرى، حافظ زهدى گبى قارداشلريمڭ يازدقلرينى گوردكجه، شوقم آرتييوردى. اميدڭ فوقنده بر ترقّيات گوردم. بو أثنالردهكى عنايتڭ بر قسمى قلبه طلوع ايدييوردى. بر قسمى إدارۀِ تعيّشمه تعلّق ايدييوردى. بر قسمى ده يازى يازاركن وقوع بولويوردى. مثلا صوڭ بر حادثهيى عرض ايدهجگم. شويله كه:
أڭ صوڭ يازديغم سورۀِ توبهنڭ (١٩٧) نجى صحيفهسنده آلتى لفظۀِ جلال موجود، دماغمه صحيفهنڭ يازيلاجق شكلنى حاضرلادم. (سَيَرْحَمُهُمُ اللّٰهُ اِنَّ اللّٰهَ عَزٖيزٌ حَكٖيمٌ) آيتِ جليلهسندهكى ايكى دانه لفظۀِ جلال، توافق خارجى قالمق صورتيله يازمغه باشلادم. وقتا كه (فَمَا كَانَ اللّٰهُ) دهكى لفظۀِ جلالى يازدم. دوشوندم كه، ايستديگم گبى اولميهجق، اويله ايسه اوچ بر ايكى بر توافق اولسون ديدم. بن توافق ايدهجك لفظۀِ جلاله ياقلاشدقجه، لفظۀِ جلاللر توافقدن اوزاقلاشييورلردى. بر درلو آرزو ايتديگم شكلده موفّق اولامادم. أڭ نهايت حالِ حاضر وضعيت وجوده گلدى. صحيفهيى دگيشديرمك ايستدم. باقدم بو صحيفه إختياريمى ديڭلمهمشدى. بونده بر مقصد و بر غايه اولاجغنى خاطرلايهرق، صحيفهيى ييرتمادم. (١٩٨) نجى صحيفهيى يازدقدن صوڭره، دقّت ايتدم. (١٩٧) نجى صحيفهده توافق خارجى بر سطردهكى ايكى لفظۀِ جلال، (١٩٨) نجى صحيفهده عين سطر اوزرندهكى ايكى لفظۀِ جلال ايله اوست اوسته گلديگنى و ديگرينڭ (١٩٩) نجى صحيفهده پك جزئى بر إنحراف ايله (بلكه ياريم سانتيم قدردر) ديگر بر لفظۀِ جلالڭ اوستنده اولديغنى گوردم. (اَلْحَمْدُ لِلّٰهِ هٰذَا مِنْ فَضْلِ رَبّٖى) دييهرك، جنابِ حقّڭ بنم گبى عليل و پك چوق معصيت و قصورلى بر قولنى بويله قدسى بر خدمتده إستخدام ايتديرديگندن طولايى، نهايتسز سروره مستغرق اولدم.