عبد المجيده گوندرييورم. او، يوزلرجه آدمه اوقوتديرهجق، هر بريسندن ثواب سڭا گلهجك.
رابعًا: قارداشمز عبد المجيده بر مكتوبله بعض سوزلرى گوندرييورم. سن غايت أمنيتلى بر طرزده پوستهيه وير، آدرس: «أرغنئِ عثمانيهده أصنافدن وانلى شهاب الدين أفندى واسطهسيله وانلى عبد المجيد أفندىيه» بو آدرسى يڭى حروفاتله مكتوبه و أمانته يازيڭز (*).
اَلْبَاقِى هُوَ الْبَاقِى
قارداشڭز
سعيد نورسى
* * *
(مكتوباتده اون سكزنجى مكتوب ايكنجى مسئلۀِ مهمّهدهكى سؤالڭ جوابنه بر ذيلدر)
﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق، مخلص قارداشم خلوصى بك!
سؤاللريڭزه دائر بر جواب يازمشدم. قارداشمز خسرو بر ايضاح ايستدى. او ذات روحًا سزه بڭزهديگى ايچون، اونڭ إستيضاحنه سن ده إشتراك ايتديگڭى تخيّل ايتدم. بو ذيلى يازدم، سزه گوندردم.
___
(*): مكتوبڭ بوندن صوڭرهكى "خامسًا" قسمى، مكتوباتده اوچنجى مكتوبدهدر.