(وزيرزاده مصطفىنڭ فقرهسيدر)
استادم!
بش وقت نمازدن صوڭره، حقِّ فاضلانهلريڭزه دعاجىيم و دعاڭزى رجا ايدييورم. مسلگڭزه و نشر ايتديگڭز رسالۀِ نوره قارشى حسّياتمى، ديلمله بيان ايدهمييورم. بن اُمّىيم، سائر قارداشلرم گبى إفادۀِ مرام ايدهمم. فقط فَلِلّٰهِ الْحَمْدُ، قلب و روحم رسالۀِ نورڭ تأثيراتيله إنتباهه گلمشلر. قلبمڭ إنتباهنى رؤيالرمله آڭلايورم. ذاتًا بو غفلت و ظلمت زماننڭ يقظه عالمنى، آغير بر اويقو عالمى و اويقو عالمنى ايسه، بر درجه يقظه عالمى گورويورم. اونڭ ايچون سز استاديمه قارشى رؤيالرمله سزه عرض ايدييورم.
ايشته بر رؤيامڭ خلاصهسى شودر كه: بر جامعده سزڭله برابر بولونويورز. حوليسنده بعض طلبه آرقداشلرمله تميزلك ياپييورز. بر اوتوموبيل ظهور ايتدى. مسجدڭ ياقيننده طورييور. ايچنده رسولِ أكرم عليه الصلاة والسلام بولونويور. صوڭره بر دره آچيلدى، فاصله ويردى. تعبيرينى سز استاديمه حواله ايدييورم. يالڭز بن بوندن حسّ ايدييورم كه: رسولِ أكرم عليه الصلاة والسلامڭ سنّتِ سنيهسنى إحيايه چاليشان و نشر ايدن رسالۀِ نور، رسولِ أكرم عليه الصلاة والسلامڭ تقدير و تحسيننه مظهر اولمش كه، إمدادِ روحانى ايله جامعمز اولان بو ولايته معنوى تشريف ايتدى. فقط أهلِ ضلالت دسيسهلريله، سنّتِ سنيه خدمتكارلرينى مشوّش ايدييورلر. استادلريله گوروشمهمك ايچون مانعلر تشكيل ايدييورلر.
ايكنجى رؤيامڭ خلاصهسى شودر كه: بر مزارستانڭ نهايتلرنده كثرتلى خرمانجيلرڭ بغداى صاوورديغنى و ايلريده ايكى قپولى محكم بر قلعه گبى ياپيلمش بر سراى ايچنده حضرتِ غوثِ گيلانى اوطورمش، غايت غلبهلك إنسانلر وارمش،