هيچ لياقتم اولماديغنى بن چوق ايى بيلييورم. (لَا تَقْنَطُوا مِنْ رَحْمَةِ اللّٰهِ) آيتِ جليلهسى اُميد ويرمهمش اولسه، عصيانمڭ نهايتسزلگى قارشيسنده چيلديرمق ايشدن بيله دگل.
اويله ايسه عزيز قارداشلرم، بو زواللى قارداشڭزه خير دعا بيورماڭزى بِالخاصّه رجا ايدييورم. قرآن حسابنه باقيليرسه، او زمان بلكه بعض گوزللكلر گورونهبيلير. بو ده سَوْگيلى استاديمزڭ بيوردقلرى گبى، قرآنڭ گوزللكلرى و منبعِ كوثردن گلن نورلرڭ لطيفلگى، بو خصوصى تأمين ايتمشلردر. حينِ صباوتمدن بَرى، أڭ زياده منفورم، فَلِلّٰهِ الْحَمْدُ يالان سويلهمكدر. اونڭ ايچون حقيقتى إفاده ايتديگمه أمين اولابيليرسڭز كه، يوقاريده عرض ايتديگم اوچ صفحهده إختيار و تصادف يوقدر. حاكم اولان بر دستِ غيبى و قدرِ إلٰهيدر. بونى حسّ ايدييوردم. قدرِ إلٰهىيى ايضاحه لزوم يوق. دستِ غيبڭ ده غوثِ أعظم سلطانِ أوليا باز الأشهب، سيّد عبد القادرِ گيلانى قُدِّسَ سِرُّهُ الْعَالِى حضرتلرى اولديغنى صوڭ دفعه اوگرنمش اولدق.
فقط محترم استاديمڭ عالى عفولرينه إستنادًا شونى علاوه ايدهيم كه، غوثِ أعظم حضرتلرينڭ كرامتِ غيبيهلرى، صراحةً استاديمز سعيد نورسى حضرتلرينى گوسترمكدهدر. چوجقلغندن بَرى خارقه ترجمۀِ حالى تدقيق ايديلهجك اولورسه گورولور كه، بو ذاتڭ وجودى صِرف قرآن و ايمان حسابنهدر. اوندندر كه او خارقه حالاته مظهر اولمش. بز بيچارهلر بو شمعڭ پروانهسى اولدقجه، حزب القرآن نامنه حضرتِ غوثڭ همّت و دعاسنه و جدِّ ذىشانى پيغمبريمز (صلّى اللّٰه تعالى عليه وسلّم) أفنديمز حضرتلرينڭ شفاعتنه، إلتماسنه و نهايت مُنزِل القرآنڭ عفوينه، حمايهسنه مظهر اولاجغمزه ده شبهه ايديلمهمك لازمدر.