عزيز استاد! صديقڭزڭ ضعيف روحى، بو فانى حياتده اولديغى گبى، باقى و سرمدى حياتده ده إن شاء اللّٰه علوى روحڭزڭ جناحِ شفقتندن آيريلميهجقدر، آيريلاميهجقدر و آييراميهجقلردر.
أوت غيرِ قابلِ إنكاردر كه، بو فانى حياتڭ دغدغهلرى آراسنده، حواس و لطائف هر زمان مشتاقى بولوندقلرى منوّر و محتشم آيينهيه باقهمييورلر؛ فقط او مشغلهدن فراغت ايديلديگى آنده، ينه نور بتون حشمتيله عرضِ ديدار ايدييور. بو زمانلرده هيچ آيريلق حسّ ايتمييورم. حتّى إختلافِ مكانى ده تأثيرسز گورويورم. يدنجى و اوچنجى لمعهلرڭ بورا پوستهخانهسنه وُرودى، رمضانڭ اون برينه تصادف ايدييور. بر گون پوستهده قالماسنه قارشيلق طوتولورسه، هر بر لمعه، بو مبارك آيڭ باشندن اوننه قدر برر گون آلمشلر و (اَوَّلُهُ رَحْمَةٌ) اولان عشرِ اولٰىِ رمضانده محلِّ مقصوده واصل اولمشلردر. مفتيلك إعلاننه گوره تام اوننجى گوندهدر. دردنجى و سكزنجى لمعهلرى ده بو ماهِ غفرانڭ اون دردنجى گونى آلدم. پوسته بر گون أوّل گلديگنه و بر گون ده پوستهده قاليشنه ويا برنجى مقامه صاييليرسه بو نورلى أثر ده، صانكه رمضانڭ هر گوننده بر لمعه آلارق يرينى بولمقله، هم بو عددلرڭ بوشنه قونولمديغنه، هم ده (أَوْسَطُهُ مَغْفِرَةٌ) اولان عشرِ ثانئِ رمضانده يازيلديغى محلّه يتيشهجگنه صراحت درجهسنده دلالت ايدييور.
شو ساعتده شعاعاتنى گوزيمه صوقان گونش گبى، بو قدر نورلى و ظاهر حقائقى، محضا بر عنايتِ إلٰهى اولارق، بو بيچارهيه گوستريلن بو مبارك أثرلردن، بو نورلرڭ بِحَوْلِ اللّٰه غروبسز طلوع ايتدكلرى محلّه، عطارد و زهره گبى مادّةً و معنًا ياقين بولونان حزب القرآنه دخى حافظ، صادق، خالص و صالح قارداشلريمڭ داها چوق أسرار آڭلايهجقلرينه شبهه ايتمييورم.