إنسانه حدّ و حسابه گلمهين نعمِ سبحانيهنڭ، مدد أللريله يارديمه گوندريلديگنى اوگرتمكله، بزى صوڭسز بر درياىِ فيضه غرق ايتمشدر.
بو قدسى مبارك كلمهنڭ هر سوره باشنده ذكريله، أهمّيت و عظمتى و هر خيرلى ايشلرده تكراريله مبارك بر شفاعتجى اولماسى، فرشده گزن إنسانه، عرشه چيقهجق قامت گيديرمسى و عجزِ مطلقده چيرپينان إنسانى، قديرِ مطلقه ربط ايتمكله، إنسانڭ قيمت و عزّتى گوستريلدكدن صوڭره، (اِنَّ اللّٰهَ خَلَقَ الْاِنْسَانَ عَلٰى صُورَةِ الرَّحْمٰنِ) حديثِ شريفيله منعمِ حقيقينڭ بيڭ بر أسماءِ حسنىسنڭ جلوهلرينڭ شعاعلرندن تظاهر ايدن رحمتيله پرورده ايديلمك صورتيله ده، رحمتڭ بر جلوۀِ أتمّى اولديغى ايضاح بيورولمشدر.
سَوْگيلى استادم! روحِ إنسانڭ نظرينى عقل و قلبنى و مخيّلهسنى (بِسْمِ اللّٰهِ) ايله كائنات سيماسنه، (الرَّحْمٰنِ) ايله أرض سيماسنه، (الرَّحٖيمِ) ايله أبناىِ جنسنڭ سيماىِ معنويسنه طاغيتييور. اورالردهكى رحمتِ واسعۀِ كلّيهنڭ عظمتنى، لطافتنى گوسترييور.
عزيز استادم! نظرم نرهيه ايليشسه، عقلم هر هانگى بر حالى محاكمه ايتسه، مخيّلهم نه ايله مشغول اولسه، سامعهم نه طويسه، قلبم نرهيه گيتسه، طولاشدقلرى يرلرده و تصادف ايتدكلرى شيلرده، بشره باقان پك بيوك آثارِ رحمتى گورويور. سماوات و عرش، بتون هيبتيله إنسانلرڭ سيرانگاهى، جنّت مسكنِ حقيقيسى اولويور. زمين بر خانه شكلنه گيرييور. ملأِ أعلانڭ سكنهلرى و زمين يوزينه سرپيلن يوز بيڭلرجه مخلوقات و نباتات أنواعنڭ إنسانلرڭ حاجتلرى ايچون قوشوشدقلرينى، سينكلردن باليقلره، ذرّهلردن ييلديزلره قدر كوچك بيوك هر بر مصنوع، إنسانلرڭ يوزينه وحشتله دگل، گولهرك باقدقلرينى گورويور.