هر گوندرديگڭز رسالهيى كمالِ إشتياقله اوقويورم. قيمتلى قارداشلرمله بلكه هر گون بر يردهيم. إستفادهم پك چوق. سز استاديمڭ معنوى فيضلرينى هر وقت رسالهلردن آلييورم.
أوت عزيز استادم، حسّياتمى يازهبيلسهم هر هفته مكتوبلرمله مقابله ايدهجكدم و سزه مكتوب يازمق ده، بنم ايچون أڭ بيوك مسرّتدر. عفويڭزه إستناد ايدهرك، ظاهرًا سكوتله و معنًا درگاهِ خدايه أل آچديغم وقتلرده، سزه عاجز رشدى طلبهڭز، عجزينى تقديم ايتدكجه، سَوْگيلى استادمدن بِالمقابله گورديگم لطفلر قارشيسنده، گوزياشلرمله جوابلر إعطا أيلهيورم، أفنديم.
طلبهڭز
رشدى
* * *
(حافظ علىنڭ درسنى نه طرزده آڭلاديغنى گوسترن بر فقرهسيدر)
محترم استادم!
اوتوز برنجى مكتوبڭ اون دردنجى لمعهسنڭ ايكنجى مقامنى بر دفعه كندم اوقودم. پك جزئى إستفاده ايله، دماغمده بر لذّت حسّ ايتدم. ايكنجى و اوچنجى تكرارلرمده اويله بر ذوقِ روحانى اويانديردى كه؛ أگر قلب و قلمم روحمه ترجمان اولابيلسه ايديلر، بلكه بر درجه سز استاديمه منّتدارانه عرضه جرئت أيلردم. هيهات نه قلبم و نه قلمم و نه روحم، عجز ايله اوڭمه چيقديلر و إعترافِ قصور ايدييورديلر.
سَوْگيلى خواجهم! سوزلر عنوانيله نشرِ أنوار و فتحِ بابِ رحمت ايدن أنوارِ قرآنيه أساسًا خاص، مخصوص بر سكّۀِ خاتمى طاشيمقدهدرلر. هر بر پارچهسندن، شموللى رحمتِ إلٰهيهيه جزئى، كلّى بر قپوسى وار گوسترييور و گوسترمكله قپولرى