سَوْگيلى و مشفق استادم! محيى الدينِ عربى حضرتلرينڭ تبشيراتى خاطريمه گلدى. ذاتِ فاضلانهلرندهكى گورديگم شفقتِ پدرانهنڭ او بيوك ذاتڭ خبر ويرديگى شفقتِ پدرانهيى حائز بولونديغڭزه ايمان ايتدم. قادرِ مطلق حضرتلرى سز استاديمزدن قات قات راضى اولسون و بزلرى ده خدمتڭزده و خدمتِ قرآنده دائم و ثابت أيلهسين.. و استاديمزڭ قيمتلى و قدسى إشارتلرينه و قيمتلى دعالرينه مظهر أيلهسين.. آمين بِحُرْمَةِ سيّد المرسلين.
شفقتلى استادم! خدمتِ قرآنده و رسالۀِ النورڭ نشرياتندهكى ذرّۀِ واحده قبيلندن اولان مساعينڭ نزدِ عالئِ استادانهلرنده حسنِ قبوله مظهريتى، ضعيف، عاجز، فقير خدمتكاريڭز و إقتدارسز، إدراكى ناقص، إحاطهسى طار، شعورى مختل طلبهڭزى نه درجه سَوينج و سروره قلب ايتديگنى تعريف ايدهمم.
بويله معنوى و قدسى تقديراته مظهر بيوريلان و بزم گبى گناهكارلره، اوتوز سنهلك إشتياقله، اون سنهلك مناجات و نياز مقابلنده سز استاديمزى إحسان بيوران و قوللرينڭ عصيانلرينه باقميهرق هر ايستدكلرينى بيلن، ايشيدن و بلغًا ما بلغ ويرن و بتون مكوّناتى يدِ قدرتنده طوتان و هر شيئه صاحب و مالك و حاكم بولونان جنابِ حق و فيّاضِ مطلق حضرتلرينه نه صورتله حمد و شكر ايدهجگمى بيلهمييورم.
قيمتلى استادم! سز توسّط بيوريڭز، دگرسز خدمتمزله، پك آز و قيصه اولان شو دنيا حياتى ايچنده بلكه بر قطره مثابهسندهكى حمد و شكريمزى «تقبّل اللّٰه» سرّينه مظهر بيورسون إن شاء اللّٰه.