صوڭره، او سيّاحِ عالم عصرلرده گزركن، مجدّدِ ألفِ ثانى، إمامِ ربّانى أحمدِ فاروقينڭ مدرسهسنه راست گلدى، گيردى؛ اونى ديڭلهدى. او إمام، درس ويرركن دييوردى:
«بتون طريقتلرڭ أڭ مهمّ نتيجهسى، حقائقِ ايمانيهنڭ إنكشافيدر.» و «بر تك مسئلۀِ ايمانيهنڭ وضوح ايله إنكشافى، بيڭ كراماته و أذواقه مرجّحدر.» هم دييوردى: «أسكى زمانده، بيوك ذاتلر ديمشلر كه: «متكلّميندن و علمِ كلام علماسندن بريسى گلهجك، بتون حقائقِ ايمانيه و إسلاميهيى دلائلِ عقليه ايله كمالِ وضوح ايله إثبات ايدهجك.» بن ايستهيورم كه، بن او اولسهم، بلكه (حاشيه) او آدمم دييه، ايمان و توحيد بتون كمالاتِ إنسانيهنڭ أساسى، مايهسى، نورى، حياتى اولديغنى و (تَفَكُّرُ سَاعَةٍ خَيْرٌ مِنْ عِبَادَةِ سَنَةٍ) دستورى، تفكّراتِ ايمانيهيه عائد بولونماسى و نقشى طريقتنده خفى ذكرڭ أهمّيتى ايسه، بو چوق قيمتدار تفكّرڭ بر نوعى اولماسيدر.» دييه تعليم ايدردى.
___
(حاشيه): زمان إثبات ايتدى كه: او آدم، آدم دگل، رسالۀِ نوردر. بلكه أهلِ كشف، رسالۀِ نورى أهمّيتسز اولان ترجمانى و ناشرى صورتنده (كشفلرنده) مشاهده ايتمشلر؛ «بر آدم» ديمشلر.
___
سيّاح تماميله ايشيتدى. دوندى نفسنه ديدى كه: مادام بو قهرمان إمام بويله دييور و مادام بر ذرّه قوّتِ ايمانيهنڭ زيادهلشمهسى، بر بطمان معرفت و كمالاتدن داها قيمتليدر و يوز أذواقڭ بالندن داها طاتليدر. و مادام بيڭ سنهدن بَرى ايمان و قرآن عليهنده تراكم ايدن آوروپا فيلسوفلرينڭ إعتراضلرى و شبههلرى يول بولوب أهلِ ايمانه هجوم ايدييور. و بر سعادتِ أبديهنڭ و بر حياتِ باقيهنڭ و بر جنّتِ دائمهنڭ آناختارى، مدارى، أساسى اولان أركانِ ايمانيهيى صارصمق ايستهيورلر. ألبته هر شيدن أوّل ايمانمزى تقليددن تحقيقه چويروب قوّتلنديرملىيز.
اويله ايسه، هايدى ايلرى! گل، بولديغمز برر طاغ قوّتندهكى بو يگرمى طوقوز مرتبۀِ ايمانيهيى نمازڭ مبارك تسبيحاتنڭ مبارك عددى اولان اوتوز اوچ مرتبهسنه إبلاغ ايتمك فكريله، بو عبرتگاهڭ بر اوچنجى منزلنى داها گورمك ايچون بسم اللّٰه الرحمن الرحيمڭ آناختارى ايله ذىحيات عالمندهكى إداره و إعاشۀِ ربّانيهنڭ قپوسنى چالمالىيز و آچمالىيز دييهرك، محشرِ عجائب و مجمعِ غرائب اولان بو اوچنجى منزلڭ قپوسنى إسترحامله چالدى، بسم اللّٰه الفتّاح ايله آچدى. اوچنجى منزل گوروندى. گيردى، گوردى كه: درت حقيقتِ معظّمه و محيطه او منزلى ايشيقلانديرييورلر و گونش گبى توحيدى گوسترييورلر.
برنجى حقيقت: «فتّاحيت» حقيقتيدر.
يعنى: فتّاح إسمنڭ تجلّيسيله بسيط بر مادّهدن آيرى آيرى، چشيد چشيد، حدسز منتظم صورتلرڭ، برابر، هر طرفده بر آنده، بر فعل ايله آچيلماسيدر. أوت ناصلكه عموم كائناتڭ باغستاننده آيرى آيرى حدسز موجوداتى؛ چيچكلر مِثللو، فتّاح إسميله هر بريسنه مناسب بر طرزِ منتظم و بر شخصيتِ ممتازه قدرتِ فاطره آچمش، ويرمش. عينًا اويله ده، فقط داها معجزاتلى اولارق؛ زمين باغچهسنده درت يوز بيڭ أنواعِ ذىحياته دخى، هر بريسنه غايت صنعتلى و حكمتلى بر صورتِ موزونه و مزيَّنه و ممتازه ويرمش.
﴿يَخْلُقُكُمْ فٖى بُطُونِ اُمَّهَاتِكُمْ خَلْقًا مِنْ بَعْدِ خَلْقٍ فٖى ظُلُمَاتٍ ثَلَاثٍ ذٰلِكُمُ اللّٰهُ رَبُّكُمْ لَهُ الْمُلْكُ لَٓا اِلٰهَ اِلَّا هُوَ فَاَنَّا تُصْرَفُونَ ۞ اِنَّ اللّٰهَ لَا يَخْفٰى عَلَيْهِ شَىْءٌ فِى الْاَرْضِ وَلَا فِى السَّمَٓاءِ ۞ هُوَ الَّذٖى يُصَوِّرُكُمْ فِى الْاَرْحَامِ كَيْفَ يَشَٓاءُ لَٓا اِلٰهَ اِلَّا هُوَ الْعَزٖيزُ الْحَكٖيمُ ۞﴾
آيتلرڭ إفادهسيله توحيدڭ أڭ قوّتلى دليلى و قدرتڭ أڭ حيرتلى معجزهسى، صورتلرى آچماسيدر. بو حكمته بناءً، فتحِ صُوَرْ حقيقتى تكرار ايله (بر قاچ صورتلرده) رسالة النورده و بِالخاصّه بو رسالهنڭ ايكنجى مقامنڭ برنجى بابنده آلتنجى و يدنجى مرتبهلرنده إثبات و بيان ايديلمهسندن اونلره حواله ايدوب، بوراده بو قدر ديرز كه:
فنِّ نباتات و فنِّ حيواناتڭ شهادتيله و تدقيقاتِ عميقهسيله، بو فتحِ صُوَرْده اويله بر إحاطه و شمول و صنعت وار كه؛ بر تك واحدِ أحددن و هر شيده هر شيئى گورهبيلهجك و ياپابيلهجك بر قديرِ مطلقدن باشقه هيچ بر شى بو جمعيتلى و إحاطهلى فعله صاحب اولاماز. چونكه بو فتحِ صُوَرْ فعلى ايسه، هر يرده و هر آنده بولونان، نهايتسز بر قدرتڭ ايچنده نهايت درجهده بر حكمت، بر دقّت، بر إحاطه ايستر. و بويله بر قدرت ايسه، آنجق بتون كائناتى إداره ايدن بر تك ذاتده بولونهبيلير.
أوت مثلا مذكور آيتلرڭ فرمان ايتدكلرى گبى؛ اوچ قراڭلق ايچنده بتون والدهلرڭ أرحامنده إنسانلرڭ صورتلرينى آيرى آيرى، ميزانلى، إمتيازلى، زينتلى و إنتظاملى اولارق، هم شاشيرمادن، ياڭليش ايتمهدن، قاريشديرمادن بسيط بر مادّهدن آچمق و ياراتمق اولان فتّاحيت و عموم روىِ زمينده عين قدرت، عين حكمت، عين صنعتله عموم إنسانلرى و حيوانلرى و نباتلرى إحاطه ايدن بو فتحِ صُوَرْ حقيقتى؛ وحدانيتڭ أڭ قوّتلى بر برهانيدر. چونكه إحاطه ايتمك بر وحدتدر، شركه ير بيراقماز. و برنجى بابده وجوبِ وجوده شهادت ايدن اون طوقوز حقيقت ناصلكه وجودلريله خالقڭ وجودينه دلالت ايدرلر؛ اويله ده، إحاطهلريله ده وحدته شهادت ايدرلر.
بزم يولجينڭ اوچنجى منزلده گورديگى
ايكنجى حقيقت: «رحمانيت» حقيقتيدر.
يعنى: گوزيمزله گورويورز، بريسى وار كه، بزه زمين يوزينى رحمتڭ بيڭلرله هديهلرى ايله طولديرمش، بر ضيافتگاه ياپمش و رحمانيتڭ يوز بيڭلرله آيرى آيرى لذّتلى طعاملرى ايچنده ديزيلمش بر سفره ايتمش و زمين ايچنى رحيميت و حكيميتڭ بيڭلرله قيمتدار إحسانلرينى جامع بر مخزن ياپمش. و زمينى دورِ سنويسنده بر تجارت گميسى حكمنده هر سنه عالمِ غيبدن لوازماتِ إنسانيه و حياتيهنڭ يوز بيڭ چشيدلرندن أڭ گوزللرينى ايچنه آلارق يوكلنمش بر نوع سفينه ويا شمندوفر گبى و هر بهارى ايسه، أرزاق و ألبسهمزى طاشييان بر واغون حكمنده اولارق بزلره گوندرر. بزى غايت رحيمانه بسلتديرر. و بتون او هديهلردن، او نعمتلردن إستفاده ايتمهمز ايچون بزه ده يوزلرله و بيڭلرله إشتهالر، إحتياجلر، طويغولر، حسّياتلر، حسلر ويرمش.
أوت آيتِ حسبيهيه دائر اولان دردنجى شعاعده ايضاح و إثبات ايديلديگى گبى، بزه اويله بر معده ويرمش كه، حدسز طعاملردن لذّت آلير. و اويله بر حيات إحسان ايتمش كه، طويغولرى ايله (بر سفرۀِ نعمت گبى) قوجه جسمانى عالمده حدسز نعمتلرندن إستفاده ايدر. و اويله بر إنسانيت بزه لطف ايتمش كه، عقل و قلب گبى چوق آلَتلرى ايله هم مادّى هم معنوى عالمڭ نهايتسز هديهلرندن ذوق آلير. و اويله بر إسلاميت بزه بيلديرمش كه؛ عالمِ غيب و عالمِ شهادتڭ نهايتسز خزينهلرندن نور آلير. و اويله بر ايمان هدايت ايتمش كه، دنيا و آخرت عالملرينڭ حصره گلمز أنوارندن و هديهلرندن تنوّر ايدوب مستفيد ايدر. گويا رحمت طرفندن بو كائنات حدسز آنتيقه و عجيب و قيمتلى شيلرله تزيين ايديلمش بر سرايدر. و بتون او سرايدهكى حدسز صاندوقلرى و منزللرى آچاجق آناختارلر إنسانڭ أللرينه ويريلمش و بتون اونلردن إستفاده ايتديرهجك اولان إحتياجلر، حسّياتلر إنسانڭ فطرتنه ويريلمش.
ايشته بويله دنيايى و آخرتى و هر شيئى قاپلامش بر رحمت، ألبته او رحمت، واحديت ايچنده بر أحديتڭ جلوهسيدر.
يعنى ناصلكه گونشڭ ضياسى، مقابلندهكى عموم أشيايى إحاطه ايتمهسى ايله واحديته بر مثال اولديغى گبى، پارلاق و شفّاف هر بر شى دخى قابليتنه گوره گونشڭ هم ضياسنى، هم حرارتنى هم ضياسندهكى يدى رنگنى، هم عكسِ مثالنى آلمقله أحديته بر مثال اولديغندن؛ ألبته او إحاطهلى ضيايى گورن آدم، أرضڭ گونشى واحددر، بر تكدر دييه حكم ايدر. و هر پارلاق شيده حتّى قطرهلرده گونشڭ ايشيقلى، حرارتلى عكسنى مشاهده ايدن او آدم، گونشڭ أحديتنى، يعنى بِالذّات گونشى صفتلرى ايله هر شيئڭ يانندهدر و هر شيئڭ آيينۀِ قلبندهدر دييهبيلير. عينًا اويله ده: رحمٰنِ ذو الجمالڭ گنيش رحمتى دخى ضيا گبى عموم أشيايى إحاطهسى او رحمانڭ واحديتنى و هيچ بر جهتده شريكى بولونماديغنى گوسترديگى گبى، هر شيده خصوصًا هر بر ذىحياتده و بِالخاصّه إنسانده او جمعيتلى رحمتڭ پردهسى آلتنده او رحمانڭ أكثر إسملرينڭ ايشيقلرى و بر نوع جلوۀِ ذاتيهسى بولونهرق، هر فرده بتون كائناته باقديرهجق و مناسبتدارلق ويرهجك بر جمعيتِ حياتيه ويرمهسى دخى او رحمانڭ أحديتنى و هر شيئڭ ياننده حاضر و هر شيئڭ هر شيئنى ياپان (او) اولديغنى إثبات ايدر.
أوت ناصلكه او رحمٰن، او رحمتڭ واحديتيله و إحاطهسيله، كائناتڭ مجموعنده و زمينڭ يوزنده جلالنڭ حشمتنى گوسترييور. اويله ده، أحديتڭ جلوهسيله هر بر ذىحياتده، خصوصًا إنسانده بتون نعمتلرڭ نمونهلرينى او فردده طوپلايوب، او ذىحياتڭ آلات و جهازاتنه گچيروب تنظيم ايدهرك، مجموعِ كائناتى (پارچهلانمهدن) او تك فرده، بر جهتده عين خانهسى گبى ويرديرمسيله دخى، جمالنڭ خصوصى شفقتنى إعلان ايدر و إنسانده أنواعِ إحساناتنڭ تمركزينى بيلديرر.
هم ناصلكه بر قاوونڭ (مثلا) هر بر چكردگنده، او قاوون تمركز ايدييور. و او چكردگى ياپان ذات ألبته اودر كه؛ او قاوونى ياپار، صوڭره علمنڭ خصوصى ميزانيله و حكمتنڭ اوڭا مخصوص قانونيله او چكردگى اوندن صاغار، طوپلار، تجسّم ايتديرر. و او تك قاوونڭ تك و واحد اوستهسندن باشقه هيچ بر شى، او چكردگى ياپاماز و ياپماسى محالدر. عينًا اويله ده، رحمانيتڭ تجلّيسيله كائنات بر آغاج، بر بوستان و زمين بر ميوه، بر قاوون و ذىحيات و إنسان بر چكردك حكمنده اولديغندن؛ ألبته أڭ كوچك بر ذىحياتڭ خالقى و ربّى، بتون زمينڭ و كائناتڭ خالقى اولمق لازم گلير.
الحاصل: ناصلكه إحاطهلى اولان فتّاحيت حقيقتيله بتون موجوداتڭ منتظم صورتلرينى بسيط مادّهدن ياپمق و آچمق، وحدتى بداهتله إثبات ايدر. اويله ده هر شيئى إحاطه ايدن «رحمانيت» حقيقتى دخى، وجوده گلن و دنيا حياتنه گيرن بتون ذىحياتلرى و بِالخاصّه يڭى گلنلرى كمالِ إنتظامله بسلمهسى و لوازماتنى يتيشديرمسى و هيچ برينى اونوتمامسى و عين رحمت، هر يرده، هر آنده و هر فرده يتيشمهسيله بداهتله هم وحدتى، هم وحدت ايچنده أحديتى گوسترر. رسالۀِ نور إسمِ حكيم و إسمِ رحيمڭ مظهرى اولديغندن، رسالۀِ نورڭ بر چوق يرلرنده، حقيقتِ رحمتڭ نكتهلرى و جلوهلرى ايضاح و إثبات ايديلديگندن، بوراده بو قطره ايله او بحره إشارت ايدوب او پك اوزون قصّهيى قيصه كسييورز.
سيّاحمزڭ اوچنجى منزلده مشاهده ايتديگى
اوچنجى حقيقت: «مدبّريت و إداره حقيقتى»در.
يعنى، غايت دهشتلى و سرعتلى أجرامِ سماويهيى و غايت إستيلاجى و قاريشديريجى عنصرلرى و غايت إحتياجلى، ضعفيتلى مخلوقاتِ أرضيهيى كمالِ إنتظام و موازنه ايله إداره ايتمك، بربرلرينه معاونتدار ياپمق و إمتزاجكارانه إداره ايتمك و تدبيرلرينى گورمك و بو قوجه عالمى بر مكمّل مملكت، بر محتشم شهر، بر مزيَّن سراى گبى ياپمق حقيقتيدر.
ايشته بو جبّارانه و رحمانانه إدارهنڭ بيوك دائرهلرينى بيراقوب، يالڭز بهارده زمين يوزنده جريان ايدن او إدارهنڭ بر تك صحيفه و صفحهسنى، رسالة النور اوننجى سوز گبى مهمّ رسالهلرنده ايضاح و إثبات ايتمهسنه بناءً، قيصه بر صورتنى بر تمثيل ايله گوسترهجگز؛ شويله كه:
مثلا و فرضا؛ خارقه و جهانگير بر ذات، درت يوز بيڭ آيرى آيرى ملّتلردن، طائفهلردن بر اوردو تشكيل ايتسه، هر ملّتڭ و هر طائفهنڭ نفرلرينه عائد ألبسهلرينى، هم سلاحلرينى، هم يمكلرينى، هم تعليمات هم ترخيصاتلرينى، هم خدماتلرينى، بربرندن آيرى آيرى، هم چشيد چشيد اولارق بتون او مختلف جهازاتى نقصانسز، قصورسز، ياڭليشسز، خطاسز، وقتى وقتنه، گجيكمهدن، قاريشديرمادن كمالِ إنتظامله و غايت مكمّل بر طرزده او معجزاتلى قوماندان ويرسه؛ ألبته او غايت گنيش و قاريشق و اينجه و موازنهلى و كثرتلى و عدالتلى إدارهيه، او خارقه قوماندانڭ فوق العاده قدرتندن باشقه هيچ بر سبب ألنى اوزاتاماز. أگر اوزاتسه، موازنهيى بوزار و قاريشديرر.
عينًا اويله ده، گوزيمزله گورويورز كه؛ بر دستِ غيبى هر بهارده درت يوز بيڭ مختلف نوعلردن مركّب بر محتشم اوردويى ايجاد ايدوب إداره ايدييور. قيامته نمونه اولان گوز موسمنده، او درت يوز بيڭدن اوچ يوز بيڭ نباتى و حيوانى نوعلرينى وفاتلر صورتنده و موتلر نامنده ترخيص ايدوب وظيفهلرندن پايدوس ايدييور. و حشر و نشره نمونه اولان بهارده حشرِ أعظمڭ اوچ يوز بيڭ مثالنى (بر قاچ هفته ظرفنده) كمالِ إنتظامله إنشا ايدوب، حتّى بر تك آغاجده درت كوچك حشرلرى، يعنى كندينى و ياپراقلرينى و چيچكلرينى و ميوهلرينى، گيتمش بهارڭ عينى گبى نشرلرينى گوزيمزه گوستردكدن صوڭره، او درت يوز بيڭ أنواعه بالغ اولان اوردوىِ سبحانينڭ هر نوعه، هر طائفهيه مخصوص و مناسب آيرى آيرى رزقلرينى و چشيد چشيد مدافعه سلاحلرينى و آيرى آيرى لباسلرينى و آيرى آيرى تعليملرينى و ترخيصلرينى و آيرى آيرى بتون جهازات و لوازماتلرينى، كمالِ إنتظامله، سهوسز، خطاسز، قاريشديرمادن و هيچ برينى اونوتمادن، اومولمدق يرلردن وقتى وقتنه ويرمكله كمالِ ربوبيت و حاكميت و حكمت ايچنده وحدانيتنى و أحديتنى و فرديتنى و نهايتسز إقتدارينى و حدسز رحمتنى إثبات ايدهرك، بو توحيد فرماننى زمين يوزنده، هر بهار صحيفهسنده، قلمِ قدر ايله يازار.
بزم سيّاح، يالڭز بر بهارده بو فرمانڭ بر تك صحيفهسنى اوقودقدن صوڭره، نفسنه ديدى كه: بويله هر بهارده حشرِ أكبردن داها غريب بيڭلرله حشرلرى إنشا ايدن، مكافات و مجازات ايچون قدرتنه نسبةً بر بهاردن داها قولاى اولان حشرى ياپاجغنى و قيامتى گتيرهجگنى عموم أنبياسنه بيڭلرله دفعه وعد و عهد ايدن و قرآنده حشرڭ وقوعنه بيڭلرله إشارتله برابر، بيڭ عدد آيتلرنده صراحةً حكم ايدوب تهديد و تعهّد ايدن بر قديرِ جبّارڭ، بر قهّارِ ذو الجلالڭ او قدر وعدلرينى تكذيب و قدرتنى إنكار حكمنده اولان إنكارِ حشر خطاسنى إرتكاب ايدنلره جهنّم عذابى عينِ عدالتدر دييه حكم ايتدى، نفسى دخى «آمنّا» ديدى.
دنيا يولجيسنڭ اوچنجى منزلده مشاهده ايتديگى
دردنجى حقيقت اولان اوتوز اوچنجى مرتبه: «رحيميت و رزّاقيت حقيقتى»در.
يعنى عموم زمين يوزنده و ايچنده و هواسنده و دڭزنده بتون ذىحياتڭ و بِالخاصّه ذىروحڭ و بِالخاصّه عاجز و ضعيفلرڭ و بِالخاصّه ياورولرڭ؛ هم مادّى و معدوى، هم معنوى بتون رزقلرينى، شفقتكارانه، قورو و بسيط بر طوپراقدن و جامد و كميك گبى قورو اودون پارچهلرندن ياپيلان و بِالخاصّه أڭ لطيفى قان و فيشقى اورتهسندن گلن و بر درهم كميك گبى بر تك چكردكدن ياپيلان بيڭلرله اوقّه طعاملرڭ، وقتى وقتنه مقنّن بر صورتده هيچ برينى اونوتميهرق و شاشيرميهرق گوزيمز اوڭنده (بر دستِ غيبى طرفندن) ويريلمسى حقيقتيدر.
أوت (اِنَّ اللّٰهَ هُوَ الرَّزَّاقُ ذُو الْقُوَّةِ الْمَتٖينُ) آيتى، إعاشهيى و إنفاقى جنابِ حقّه تخصيص ايدوب حصر ايتديگى گبى،
﴿وَمَا مِنْ دَٓابَّةٍ فِى الْاَرْضِ اِلَّا عَلَى اللّٰهِ رِزْقُهَا وَيَعْلَمُ مُسْتَقَرَّهَا
وَمُسْتَوْدَعَهَا كُلٌّ فٖى كِتَابٍ مُبٖينٍ﴾
آيتى دخى، بتون إنسانلرڭ و حيوانلرڭ رزقلرينى تعهّد و تكفّلِ ربّانى آلتنه آلديغى؛ هم
﴿وَكَاَيِّنْ مِنْ دَٓابَّةٍ لَا تَحْمِلُ رِزْقَهَا اَللّٰهُ يَرْزُقُهَا وَاِيَّاكُمْ
وَهُوَ السَّمٖيعُ الْعَلٖيمُ﴾
آيتى ده، رزقى تدارك ايدهمهين، عاجز و إقتدارسز اولان ضعيف بيچارهلرڭ رزقلرينى اومولمدق يردن، بلكه غيبدن، بلكه هيچدن، مثلا دڭزڭ ديبندهكى بوجكلره هيچدن و بتون ياورولره اومولمدق يرلردن و بتون حيوانلره هر بهارده عادتا صِرف غيبدن إنفاقلرينى بِالفعل تكفّل ايدهرك بِالمشاهده ويرمكله؛ أسبابپرست إنسانلره دخى، أسباب پردهسى آلتنده ينه او ويرييور دييه إثبات و إعلان ايتديگى گبى؛ پك چوق آياتِ قرآنيه و حدسز شواهدِ كونيه، بِالإتّفاق هر بر ذىحياتڭ بر تك رزّاقِ ذو الجلالڭ رحيميتى ايله بسلندكلرينى گوسترييورلر.
أوت، بر نوع رزق ايستهين آغاجلر إقتدارسز و إختيارسز اولدقلرندن، اونلر يرلرنده متوكّلانه طوروركن رزقلرى اونلره قوشوب گلمهسى و عاجز ياورولرڭ نفقهلرى حيرتنمون طولومبهجقلردن آغزلرينه آقماسى و او ياورولره بر پارچه إقتدار و آزيجق بر إختيار گلمهسيله سوت كسيلمسى، خصوصًا إنسان ياورولرينه آنالرينڭ شفقتلرى يارديمجى ويريلمسى، بداهتله إثبات ايدر كه؛ حلال رزق، إقتدار و إختيار ايله متناسبًا دگلدر.. بلكه، توكّل ويرن ضعف و عجزه نسبةً گلييور.
أكثريتجه سببِ خسران اولان حرصى تحريك ايدن إقتدار و إختيار و ذكاوت، بر قسم بيوك أديبلرده او أديبلرى بر نوع ديلنجيلگه قدر سَوق ايتديگى گبى؛ ذكاوتسز، قابا چوق عامى آدملرڭ توكّلوارى إقتدارسزلقلرى دخى اونلرى زنگينلگه ايصال ايتمهسى و
﴿كَمْ عَالِمٍ عَالِمٍ اَعْيَتْ مَذَاهِبُهُ وَجَاهِلٍ جَاهِلٍ تَلْقَاهُ مَرْزُوقًا﴾
ضربِ مَثل اولماسى إثبات ايدر كه: رزقِ حلال إقتدار و إختيار قوّتيله قزانيلماز، بولديريلماز. بلكه چاليشماسنى و سعينى قبول ايدن بر مرحمت طرفندن ويريلير و إحتياجنه آجييان بر شفقت جانبندن إحسان ايديلير. فقط، رزق ايكيدر:
برى:
ياشامق ايچون حقيقى و فطرى رزقدر كه؛ تعهّدِ ربّانى آلتندهدر. حتّى او قدر منتظمدر كه؛ بدنده ياغ و سائره صورتنده إدّخار اولونان فطرى رزق، هيچ اولمازسه يگرمى گوندن زياده بر شى ييمهدن ياشاتير، حياتنى إدامه ايدر. ديمك يگرمى اوتوز گوندن أوّل و بدنده مدّخر اولان فطرى رزقى بيتمهدن ظاهرًا آجلقدن وفات ايدنلر رزقسزلقدن دگل، بلكه سوءِ إعتياددن و تركِ عادتدن نشئت ايدن بر خستهلقدن وفات ايدرلر.
ايكنجى قسم رزق:
إعتياد، إسراف و سوءِ إستعمالات ايله ترياكى اولوب ضرورت حكمنه گچن مجازى و صنعى رزقدر. بو قسم ايسه؛ تعهّدِ ربّانى آلتنده دگل، بلكه إحسانه تابعدر. كاه ويرر، كاه ويرمز.
بو ايكنجى رزقده، بختيار اودر كه؛ مدارِ سعادت و لذّت اولان إقتصاد و قناعتله سعىِ حلالى، بر نوع عبادت و رزق ايچون بر فعلى دعا بيلهرك متشكّرانه و منّتدارانه او إحسانى قبول ايدوب حياتنى سعادتكارانه گچيرر.
و بدبخت اودر كه؛ مدارِ شقاوت و خسارت و ألم اولان إسراف و حرص ايله سعىِ حلالى بيراقهرق، هر قپويه باش ووروب، تنبلكارانه و ظالمانه و مشتكيانه حياتنى گچيرر، بلكه ئولديرر.
ناصلكه معده بر رزق ايستر؛ اويله ده، قلب و روح و عقل و گوز و قولاق و آغز گبى إنسانڭ لطيفهلرى و طويغولرى دخى رزّاقِ رحيمدن رزقلرينى ايسترلر و متشكّرانه آليرلر. هر بريسنه آيرى آيرى و اونلره لايق و اونلرى ممنون و متلذّذ ايدن رزقلرى، خزينۀِ رحمتدن إحسان ايديلير. بلكه رزّاقِ رحيم، اونلره داها گنيش رزق ويرمك ايچون گوز و قولاق، قلب و خيال و عقل گبى او لطيفهلرڭ هر بريسنى، خزينۀِ رحمتنڭ برر آناختارى حكمنده ياراتمش. مثلا: گوز، كائنات يوزندهكى حُسن و جمال گبى قيمتدار جوهر خزينهلرينڭ بر آناختارى اولديغى مِثللو، اوتهكيلر دخى (هر برى) برر عالمڭ آناختارى اولور؛ ايمان ايله إستفاده ايدر. ينه صدديمزه دونويورز.
بو كائناتى يارادان ذاتِ قديرِ حكيم، ناصلكه كائناتدن حياتى بر خلاصۀِ جامعه اولارق خلق ايدوب، عموم مقصدلرينى و إسملرينڭ جلوهلرينى اونده تمركز ايتديرييور. اويله ده، حيات عالمنده دخى، رزقى بر جمعيتلى مركزِ شئونات ياپارق، إشتها إحتياجنى و ذوقِ رزقىيى ذىحياتده خلق ايدهرك؛ خلقتِ كائناتڭ أڭ أهمّيتلى بر غايهسى و بر حكمتى اولان دائمى و كلّى بر تشكّر و منّتدارلق و پرستشلك ايله ربوبيتنه و سَوْديرمسنه قارشى مقابله ايتديرييور.
مثلا: چوق گنيش اولان مملكتِ ربّانيهنڭ هر طرفنى، خصوصًا ملائكه و روحانيلر ايله سماواتى و أرواح ايله عالمِ غيبى شنلنديرديگى گبى؛ مادّى عالمى دخى، خصوصًا هوا و أرضى، هر وقت و هر طرفنى ذىروحڭ، خصوصًا قوشلرڭ و قوشجقلرڭ وجودلريله شنلنديرمك و روحلانديرمق حكمتيله إحتياجِ رزقى و رزقڭ ذوقى پك قوّتلى بر قامچى اولارق حيوانلرى و إنسانلرى رزق پشنده قوشديرمقله تحريك ايدهرك تنبللكدن و عطالتدن قورتاروب گزديرمهسى، شئوناتِ ربوبيتڭ بر حكمتيدر. أگر بو حكمت گبى مهمّ حكمتلر اولماسه ايدى، آغاجلرڭ أرزاقنى اونلره قوشديرديغى گبى، حيوانلرڭ ده مقنّن اولان تعييناتلرينى اونلره زحمتسز بر صورتده فطرى حاجتلرينى قوشديرهجقدى.
إسمِ رحيم و رزّاقڭ جماللرينى و وحدانيته شهادتلرينى تام گورمك ايچون زمين يوزينى بردن إحاطه ايدوب مشاهده ايدهجك بر گوز بولونسه، قيش آخرنده أرزاقلرى بيتمك اوزره اولان حيوانات قافلهلرينه، إمدادِ غيبى و إحسانِ رحمانى اولارق نباتاتڭ أللرينه ويريلن و آغاجلرڭ باشلرينه قونيلان و والدهلرڭ سينهلرينه طاقيلان و صِرف خزينۀِ غيبيۀِ رحمتدن غايت لذيذ و غايت چوق و غايت متنوّع طعاملرى و نعمتلرى گوندرن رزّاقِ رحيمڭ بو جلوۀِ شفقتنده نه قدر شيرين بر گوزللك، نه قدر طاتلى بر جمال بولونديغنى گورهجك و اوندن بيلهجك كه؛ بر تك ألمايى ياپوب بر آدمه حقيقى بر رزق اولارق منعمانه ويرن، يالڭز اويله بر ذات ياپار ويرر كه؛ موسملرى، گيجه و گوندوزلرى چويرر و كُرۀِ أرضى بر سفينۀِ تجّاريه گبى گزديرهرك موسملرڭ محصولاتلرينى اونڭله زميندهكى محتاج مسافرلرينه گتيرر. چونكه او ألمانڭ يوزنده بولونان سكّۀِ فطرت و خاتمِ حكمت و طرّۀِ صمديت و مُهرِ رحمت، بتون ألمالرده و سائر ميوهلرده و بتون نباتات و حيواناتده بولونديغندن او تك ألمانڭ حقيقى مالكى و صانعى، ألبته و هر حالده او ألمانڭ أمثالى و همجنسى و قارداشلرى اولان بتون سكنۀِ أرضڭ و اونڭ باغچهسى اولان قوجه زمينڭ و اونڭ فابريقهسى اولان آغاجنڭ و اونڭ تزگاهى اولان موسمنڭ و اونڭ تربيهگاهى اولان بهار و يازڭ مالكِ ذو الجلالى و خالقِ ذو الجمالى اولاجق، باشقه اولاماز.
ديمك هر بر ميوه اويله بر مُهرِ وحدتدر كه؛ اونڭ آغاجى اولان أرضڭ و اونڭ باغچهسى اولان كائنات كتابنڭ كاتبنى و صانعنى بيلديرر و وحدتنى گوسترر و ميوهلر عددنجه وحدانيت فرماننڭ مُهرلنديگنه إشارت ايدر. رسالة النور إسمِ رحيم و إسمِ حكيمڭ مظهرى اولديغندن، بو رحيميت حقيقتنڭ چوق لمعهلرينى و چوق سرلرينى رسالة النور چوق أجزالرنده بيان و إثبات ايتديگندن، اوڭا حواله ايله بو پك بيوك خزينهدن حالمڭ مساعدهسزلگى جهتيله بو قيصه إشارتله إكتفا ايديلدى.
ايشته بزم سيّاح دييور كه: الحمد لِلّٰهِ هر يرده آراديغم و هر شيدن صورديغم خالقمڭ و مالكمڭ وجوبِ وجودينه و وحدتنه شهادت ايدن اوتوز اوچ حقيقتى گوردم و ديڭلهدم. هر بر حقيقت، گونش گبى پارلاق، قراڭلق بيراقماز؛ طاغ گبى قوّتلى و صارصيلماز. و هر برى تحقّقيله وجودينه غايت قطعى شهادت ايدر و إحاطهسيله وحدتنه غايت ظاهر دلالت ايدر. و سائر أركانِ ايمانيهيى دخى ايچنده قوّتلى إثبات ايتمكله برابر مجموع حقيقتلرڭ إجماعى و إتّفاقى، ايمانمزى تقليددن تحقيقه و تحقيقدن علم اليقينه و علم اليقيندن عين اليقينه و عين اليقيندن حقّ اليقينه إبلاغ ايدييور.
﴿اَلْحَمْدُ لِلّٰهِ هٰذَا مِنْ فَضْلِ رَبّٖى﴾
﴿اَلْحَمْدُ لِلّٰهِ الَّذٖى هَدٰينَا لِهٰذَا وَمَا كُنَّا لِنَهْتَدِىَ لَوْلَٓا اَنْ هَدٰينَا اللّٰهُ لَقَدْ جَٓاءَتْ رُسُلُ رَبِّنَا بِالْحَقِّ﴾
ايشته بو پرمراق سيّاحڭ، بو اوچنجى منزلده مشاهده ايتديگى درت معظّم حقيقتلردن آلديغى أنوارِ ايمانيهيه غايت قيصه بر إشارت اولارق برنجى مقامڭ ايكنجى بابنده اوچنجى منزلڭ حقيقتلرينه دائر شويله دينيلمش:
﴿لَا اِلٰهَ اِلَّا اللّٰهُ الْوَاحِدُ الْاَحَدُ الَّذٖى دَلَّ عَلٰى وَحْدَتِهٖ فٖى وُجُوبِ وُجُودِهٖ مُشَاهَدَةُ عَظَمَةِ اِحَاطَةِ حَقٖيقَةِ الْفَتَّاحِيَّةِ بِفَتْحِ الصُّوَرِ لِاَرْبَعِ مِاَةِ اَلْفِ نَوْعٍ مِنْ ذَوِى الْحَيَاةِ الْمُكَمَّلَةِ بِلَا قُصُورٍ بِشَهَادَةِ فَنِّ النَّبَاتِ وَالْحَيَوَانِ .. وَكَذَا مُشَاهَدَةُ عَظَمَةِ اِحَاطَةِ حَقٖيقَةِ الرَّحْمَانِيَّةِ الْوَاسِعَةِ الْمُنْتَظَمَةِ بِلَا نُقْصَانٍ بِالْمُشَاهَدَةِ وَالْعَيَانِ .. وَكَذَا مُشَاهَدَةُ عَظَمَةِ حَقٖيقَةِ الْاِدَارَةِ الْمُحٖيطَةِ لِجَمٖيعِ ذَوِى الْحَيَاةِ وَالْمُنْتَظَمَةِ بِلَا خَطَاءٍ وَلَا نُقْصَانٍ .. وَكَذَا مُشَاهَدَةُ عَظَمَةِ اِحَاطَةِ حَقٖيقَةِ الرَّحٖيمِيَّةِ وَالْاِعَاشَةِ الشَّامِلَةِ لِكُلِّ الْمُرْتَزِقٖينَ الْمُقَنَّنَةِ فٖى كُلِّ وَقْتِ الْحَاجَةِ بِلَا سَهْوٍ وَلَا نِسْيَانٍ ۞ جَلَّ جَلَالُ رَزَّاقِهَا الرَّحْمٰنِ الرَّحٖيمِ الْحَنَّانِ الْمَنَّانِ وَعَمَّ نَوَالُهُ وَشَمِلَ اِحْسَانُهُ وَلَا اِلٰهَ اِلَّا هُوَ ۞﴾
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
﴿يَا رَبِّ بِحَقِّ بِسْمِ اللّٰهِ الرَّحْمٰنِ الرَّحٖيمِ يَا اَللّٰهُ يَا رَحْمٰنُ يَا رَحٖيمُ صَلِّ وَسَلِّمْ عَلٰى سَيِّدِنَا مُحَمَّدٍ وَعَلٰى اٰلِهٖ وَاَصْحَابِهٖ اَجْمَعٖينَ بِعَدَدِ جَمٖيعِ حُرُوفِ رَسَائِلِ النُّورِ الْمَضْرُوبِ تِلْكَ الْحُرُوفُ فٖى عَاشِرَاتِ دَقَائِقِ جَمٖيعِ عُمْرِنَا فِى الدُّنْيَا وَالْاٰخِرَةِ مَعَ ضَرْبِ مَجْمُوعِهَا فٖى ذَرَّاتِ وُجُودٖى فٖى مُدَّةِ حَيَاتٖى وَاغْفِرْلٖى وَلِمَنْ يُعٖينُنٖى فٖى نَشْرِ رَسَائِلِ النُّورِ وَكِتَابَتِهَا بِصَدَاقَةٍ بِكُلِّ صَلَاةٍ مِنْهَا وَلِاٰبَائِنَا وَلِسَادَاتِنَا وَشُيُوخِنَا وَلِاَخَوَاتِنَا وَاِخْوَانِنَا وَلِطَلَبَةِ رِسَالَةِ النُّورِ الصَّادِقٖينَ وَبِالْخَاصَّةِ لِمَنْ يَكْتُبُ وَيَسْتَنْسِخُ هٰذِهِ الرِّسَالَةَ بِرَحْمَتِكَ يَا اَرْحَمَ الرَّاحِمٖينَ اٰمٖينَ﴾
﴿وَاٰخِرُ دَعْوٰيهُمْ اَنِ الْحَمْدُ لِلّٰهِ رَبِّ الْعَالَمٖينَ﴾
* * *