چوق عزيز، چوق مبارك، چوق مشفق، چوق سَوْگيلى استاديمز حضرتلرى!
رسالۀِ نورى همّت و دعالريڭزله، دقّت و تفكّرله اوقودقجه، بو معظّم أثر كلّياتنڭ طلسمِ كائناتڭ معمّاسنى كشف و حلّ ايدن بر كشّاف اولديغنى، حال و إستقبالڭ بر مرشدِ أكبرى و بر رهبرِ أعظمى اولديغنى، ينه دعا و همّتڭزله إدراك ايدييورز.
أوت استاديمز حضرتلرى! رسالۀِ نورى اوقويان هر إدراك صاحبى آڭلايور كه؛ رسالۀِ نور گرك بو عصرڭ، گركسه اوڭمزدهكى عصرڭ بشريتنى فكر قراڭلقلرندن قورتاروب، تنوير و إرشاد ايدهجكدر.
رسالۀِ نور يالڭز بو وطن و ملّت ايچون دگل، عالمِ إسلام و بتون بشريتڭ إحتياجنه جواب ويرهجك بر كلّيات اولارق تأليف ايديلمشدر. بوگون تاريخده هيچ گورولمهمش بر فجاعت و فلاكت ايچريسنده چيرپينان بشريت ايچون، خلاصكار اولارق رسالۀِ نوره صاريلمقدن و نه بهاسنه اولورسه اولسون، رسالۀِ نورڭ نورانى و پارلاق أجزالرينى ألده ايدوب دقّت و تفكّرله اوقومقدن باشقه بر قورتولوش چارهسى يوقدر. رسالۀِ نورى اوقويان هركس، بو حقيقتى إدراك ايتمش و ايتمكدهدر. أگر بز مقتدر اولسهق؛ بو حقيقتى، كائناته ناظر بر محلّه چيقوب، بتون كائناته إعلان ايدهجگز. فقط مادام كه بوڭا موفّق اولامييورز و مادام كه رسالۀِ نورڭ جهانشمول قيمتنى بو درجه استاديمزڭ همّتيله إدراك ايتمشز؛ شو حالده او نور و فيض خزينهسى، عرفان و كمالات منبعى اولان رسالۀِ نورى، بر دقيقهمزى بيله بوش گچيرمهدن، متمادى و دواملى بر شكلده هر گون و هر ساعت اوقويهجغز و بو