فرصتدر. بو فرصتى قاچيررسهق، دنيامز آغلاديغى گبى آخرتمز دخى آغلايهجق. (خَسِرَ الدُّنْيَا وَالْاٰخِرَةَ) طوقاتنى ييهجگز.
بو مقام يازيلديغى زمان قربان بايرامى گلدى.
«اَللّٰهُ اَكْبَرُ» «اَللّٰهُ اَكْبَرُ» «اَللّٰهُ اَكْبَرُ»لر ايله نوعِ بشرڭ بشدن بريسنه، اوچ يوز ميليون إنسانلره بردن «اَللّٰهُ اَكْبَرُ» ديديرمهسى؛ قوجه كُرۀِ أرض، بيوكلگى نسبتنده او «اَللّٰهُ اَكْبَرُ» كلمۀِ قدسيهسنى سماواتدهكى سيّارات آرقداشلرينه ايشيتديرييور گبى، يگرمى بيڭدن زياده حاجيلرڭ عرفاتده و عيدده برابر بردن «اَللّٰهُ اَكْبَرُ» ديمهلرى، رسولِ أكرم عليه الصلاة والسلامڭ بيڭ اوچيوز سنه أوّل آل و صحابهلريله سويلهديگى و أمر ايتديگى «اَللّٰهُ اَكْبَرُ» كلامنڭ بر نوع عكسِ صداسى اولارق ربوبيتِ إلٰهيهنڭ «رَبُّ الْاَرْضِ وَرَبُّ الْعَالَمٖينَ» عظمتِ عنوانيله كلّى تجلّيسنه قارشى گنيش و كلّى بر عبوديتله بر مقابلهدر، دييه تخيّل و حسّ و قناعت ايتدم.
صوڭره، عجبا بو كلامِ قدسينڭ بزم مسئلهمزله دخى مناسبتى وار مى دييه تخطّر ايتدم. بردن خاطره گلدى كه، باشده بو كلام اولارق سائر باقياتِ صالحات عنواننى طاشييان «سُبْحَانَ اللّٰهِ» و «اَلْحَمْدُ لِلّٰهِ» و «لَا اِلٰهَ اِلَّا اللّٰهُ» گبى شعائردن چوق كلاملر، جزئى و كلّى مسئلهمزى إخطار و تحقّقنه إشارت ايدرلر. مثلا «اَللّٰهُ اَكْبَرُ»ڭ بر وجهِ معناسى، جنابِ حقّڭ قدرتى و علمى هر شيئڭ فوقنده بيوكدر، هيچ بر شى دائرۀِ علمندن چيقاماز، تصرّفِ قدرتندن قاچاماز و قورتولاماز. و قورقديغمز أڭ بيوك شيلردن داها بيوكدر. ديمك حشرى گتيرمكدن و بزى عدمدن قورتارمقدن و سعادتِ أبديهيى ويرمكدن داها بيوكدر. هر عجيب و طورِ عقلڭ خارجندهكى هر شيدن داها بيوكدر كه،
﴿مَا خَلْقُكُمْ وَلَا بَعْثُكُمْ اِلَّا كَنَفْسٍ وَاحِدَةٍ﴾
آيتنڭ صراحتِ قطعيهسيله نوعِ بشرڭ حشرى و نشرى، بر تك نفسڭ ايجادى قدر او قدرته قولاى گلير. بو معنا إعتباريلهدر كه، ضربِ مَثل حكمنده