أى عزيز استادم! رسالۀِ نورڭ حقيقتى و ميوهنڭ گوزللگى و چيچگنڭ فيضى، بنى منّتدارانه بر پارچه مملكتم نامنه قونوشديرمش و بنم گبى قونوشان چوق قلبلره حيات ويرمش. شيمدى محيطمزده رسالۀِ نوره قارشى آتيلان آديملر و اوزاتيلان أللر، ميوهنڭ اون برنجى چيچگى ايله داها چوق متانت كسب ايتمش، إنكشاف ايتمش، فعاليته باشلامشدر.
چوق حقير طلبهڭز
خسرو
* * *
(إسپارطهدهكى عموم رسالۀِ نور طلبهلرى نامنه رمضان تبريكى مناسبتيله يازيلمش و اون اوچ فقره ايله تعديل ايديلمش بر مكتوبدر.)
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
أى عالمِ إسلامڭ دنيا و آخرتده سلامتى ايچون قرآنڭ فيضيله و رسالۀِ نورڭ حقيقتيله و صادق شاكردلرڭ همّتيله مبارك گوزلرندن ياش يرينه قان آقيتان و أى فتنۀِ آخر زمانڭ شو دغدغهلى و فورطنهلى زماننده حضرتِ أيوب عليه السلامدن زياده خستهلقلره، دردلره گرفتار اولان و قرآنڭ نوريله و رسالۀِ نورڭ برهانلريله و شاكردلرڭ غيرتيله عالمِ إسلامڭ مادّى و معنوى خستهلقلرينى حكيمِ لقمان گبى تداوىيه چاليشان و أى مبارك أللرنده موجود اولان نور پارچهلرينڭ حق و حقيقت اولديغنى قرآنڭ اوتوز اوچ آيتيله و كرامتِ عَلويه و غوثيه ايله إثبات ايدن و أى كنديسى خسته و إختيار و ضعيف و غايت آجينهجق بر حالده اولديغنه گوره هركسدن زياده عالمِ إسلامه جان فدا ايدر درجهسنده آجييهرق كندينه فنالق